Собранието изгласа реконструкција на Владата: 8 министри и 2 заменици

Со 69 гласа „за“ Собранието ги изгласа осумте нови министри

Во министерските фотелји седнаа осумтемина нови членови на Владата. Азир Алиу се збогува од здравството и ја предаде функцијата на поранешниот директор на ФЗОМ, Сашо Клековски. Велковски ја презема функцијата од Фатмир Лимани и отсега ќе раководи со социјална политика демографија и млади. Прв човек во министерството за односи меѓу заедниците е Ферати кој доаѓа на местото на Стоилковиќ кој е избран за нов министер за локална самоуправа. Со земјоделството отсега ќе раководи кадар борче Серафимовски кадар на ЗНАМ. Седат Сулејмани седна на местото на Љутков во култура и туризам, професорот Шасивари отсега е на чело на правда, додека министер за односи меѓу заедниците, министер без ресор ќе биде Ерџан Демир. Зелено светло добија од Собранието и беа изгласани со 69 гласа „за“. Премиерот Мицкоски очекува нова енергија од владината реконструкција и покрај тоа што седницата помина во тензична атмосфера со меѓусебни обвинувања за работата на Владата. СДСМ и ДУИ ја напуштија салата, шефот на Владата се извини за случувањата, но нивните столчиња во салата Македонија останаа празни. Ден по седницата, лидерот на социјалдемократите, Филипче, смета оти извинувањето на премиерот е изнудено и неискрено, барајќи санкции за однесувањето на Стоилковиќ Од септември ќе се бираат замениците министри. За опозицијата владината реконструкција е увертира во нови предвремени избори. Викторија Милевска Категорија: МакедонијаNadnaslov: СобраниеСлика за вест: 

2 hours ago

Собранието разреши осум министри и двајца заменици, во тек е расправата за новиот тим

Пратениците разрешија осум министри и двајца заменици, опфатени со реконструкцијата на кабинетот на премиерот Мицкоски. „Оваа влада нема да биде влада на комфор, туку на резултати. Функциите не се сметаат за стекнато право, туку за обврска што секој ден повторно мора да се заслужува“ – порака од шефот на Владата до новите кадри на „Илинденска“. Им се заблагодари на досегашните соработници велејќи дека должноста ја вршеле чесно и најавува оти новите министри ја продолжуваат визијата на владата за градење на држава која ќе ја заслужи довербата од граѓаните. Мицкоски и со порака до опозицијата – делата кои ги оставивте се најдобриот доказ за разликата меѓу двете политички опции. Опозицијата со остра критика за работата на досегашните министри. За „Левица“ реконструкцијата е пазар за одржување на предвремени парламентарни избори. Најслаба карика во владата на Мицкоски според социјалдемократите е Љутков кој, според партијата, ги урнисал културата и вработените. И партиите од албанскиот блок со слична реторика. На расправата за именувањето на новите министри, пријавени повеќе пратеници. Викторија Милевска Tags: топКатегорија: МакедонијаNadnaslov: СобраниеСлика за вест: 

1 day ago

Владината реконструкција на дневен ред во Собранието

Собранието денеска се очекува да ја започне 112. седница на која треба да бидат разрешени и избрани нови членови на Владата. Во владиниот кабинет ќе се сменат или ќе ротираат во други ресори осуммина министри и двајца заменици министри. Според предложените кадровски решенија на премиерот Сашо Клековски ќе биде за нов министер за здравство, а неговата позиција во Фондот за здравствено осигурување ќе ја наследи Златко Перински. Иван Стоиљковиќ ќе си замине од Министерство за политички систем и односи меѓу заедниците и ќе раководи со Министерството за локална самоуправа. Агон Ферати ќе биде новиот министер во Министерство за политички систем и односи меѓу заедниците, Јетон Шасивари нов министер за правда, на местото на Игор Филков, а Седат Сулејмани, кој ќе го замени Зоран Љутков во Министерството за култура и туризам, Министер за земјоделство, шумарство и водостопанство ќе биде Борче Серафимовски, на местото на Цветан Трипуновски, а Министерството за социјална политика, демографија и млади ќе го преземе досегашниот заменик-министер Ѓоко Велковски, кој доаѓа на местото на Фатмир Лимани. За министер без ресор задолжен за инклузија и спроведување на Стратегијата за Ромите е предложен Ерџан Демир, а се очекува премиерот Мицкоски да го соопшти и неговиот избор од оваа партија што ќе раководи со министерство без ресор. Владата веќе нема да има вицепремиер и министер за добро владеење, а тие обврски ќе ги преземе неговиот Кабинет. Изборот на нови заменици министри, на позициите на Велковски и Сулејмани ќе се случи во септември. Tags: топКатегорија: МакедонијаNadnaslov: СобраниеСлика за вест: 

1 day ago

Утре на пленарка реконструкција на Владата

В понеделник во 11 часот ќе почне собраниската седница за разрешување и менување на нови министри во 8 ресори. Ова е прва реконструкција на Владата. Од владејачката ВМРО-ДПМНЕ велат дека изминативе две години покажале како се управува со државата. Партијата очекува реконструкцијата на Владата да ги забрза реформските процеси. ЗНАМ го задржува бројот на министерските места, иако наместо Правда ќе раководат со Земјоделство. Димитриевски вели, не губат ништо. Според СДСМ станува за козметички, а не квалитативни промени. Премиерот Мицкоски ги ротира истите луѓе како на шаховска табла-велат од партијата. Нов министер за здравство ќе биде Сашо Клековски, досегашниот директор на Фондот за здравствено осигурување. На негово место во ФЗО, пак, ќе дојде Златко Перински. Во Министерството за локална самоуправа седнува Иван Стоиљковиќ, кој Министерството за политички систем и односи со заедниците го препушта на Агон Ферати од Вреди. Во Правда, на местото на Филков од ЗНАМ седнува професорот Јетон Шасивари. Партијата на Димитриевски ќе раководи со земјоделство, каде нов министер на местото на Трипуновски ќе биде актуелниот државен секретар Борче Серафимовски. Освен здравство, ВМРО-ДПМНЕ под своја капа го презема Министерството за социјална политика, демографија и млади, каде нов министер ќе биде досегашниот заменик, Ѓоко Велковски. Културата и туризмот ќе ги раководи Седат Сулејмани од „Вреди“, кој го менува Љутков, а министер без ресор за инклузија и стратегијата за Ромите ќе биде Ерџан Демир. Во меѓувреме владината коалиција се прошири со Демократската партија на Турците, чии пратеник изминатиов период делуваше како независен. Премиерот Мицкоски дополнително ќе го соопшти името на нивниот министер кој треба да раководи со министерство без ресор. Марина Стојанова Тонева  Tags: топКатегорија: МакедонијаNadnaslov: СобраниеСлика за вест: 

2 days ago